Dünya tarixinin səhifələrini aramla incələsək türklər qədər qadına dəyər vərən, qadını ucaldan ikinci bir millətin olmadığını açıq aydın görərik. Türklərdə ailənin təməlini qadın təşkil edir. Türk xalqlarının qadını ailəsində söz sahibi olmuş və ərinə – igidinə daima dəstək olmuşdur. Qədim türklərdə qadın ailədə söz sahibi olduğu qədər siyasi və iqtisadi əlaqələrdə, dövlətin idarəsində də söz sahibi olmuşdur. Qadınlar gözəl qılınc oynadar, at minər və güləşərdilər. Qadınlar savaşda da iştirak edərdi.
Azərbaycan xalqının ümummilli lideri, dahi siyasətçi Heydər Əliyev Azərbaycan qadını haqqında belə bir müdrik fikir söyləyib: “Azərbaycan qadını tarix boyu öz ağlı, zəkası, namusu, qeyrəti, isməti, fədakarlığı, çalışqanlığı, mərdliyi, vətənpərvərliyi, millətinə, torpağına olan hədsiz məhəbbəti və gözəlliyilə, Azərbaycan xalqının xüsusiyyətləri ilə tanınıb”.Azərbaycan qadınları ölkənin qanunvericilik orqanlarında irəli çəkilməyə, əməyinin, ağlının təkcə istehsalat üçün yararlı olmayıb, yüksək kürsülərə layiq olduğunu sübut edirdisə, əsrin sonlarında onlar dünya qadın hərəkatının aparıcı qüvvələri kimi hərəkət edir, kişilərlə bərabər hüquq qazanmaq, öz iradəsini, bilik və düşüncəsini dövlətin – ölkənin idarəetmə və qanunvericilik sahəsinə tətbiq etməyə çalışırlar.
Bu gün ölkəmizdə beynəlxalq standartların tələblərinə cavab verən dövlət qadın siyasətinin formalaşmasını, hətta ən mötəbər beynəlxalq təşkilatlar da təsdiqləyir. Artıq respublikamızda da qadın hüquqları, qadın hərəkatı və gender siyasəti təhsil müəssisələrində tədris edilməklə dərindən öyrənilir və elmi tədqiqat obyekti kimi tədqiq edilir.
Qadınlar bütün tarixi dövrlərdə ictimai həyatda fəal iştirak edərək, cəmiyyətimizin inkişafına öz töhfələrini vermişlər.
Onların arasında görkəmli dövlət, elm, mədəniyyət və ictimai-siyasi xadimlər vardır. Qadınların cəmiyyətdəki yeri və rolunun mühüm göstəricisi onların müxtəlif dövlət vəzifələrini tutmaları və ümumiyyətlə, aktiv əmək fəaliyyəti ilə məşğul olmalarıdır. Hal-hazırda qadınlarımız dövlətin yaratdığı bütün imkanlardan istifadə edirlər. Sərbəst təhsil almaqla, fiziki hazırlıqlarını inkişaf etdirməklə, peşəkarlıq səviyyələrini artırmaqla yanaşı qadınlar həm də, ictimai-siyasi proseslərdə fəal iştirak edərək cəmiyyətin qurucusuna çevrilirlər. Gəlin dəyərli,dərin bilik və intellekt sahibi olan ,gözəl ziyallı, ictimai siyasi proseslərə biganə qalmayan xanımlarımızdan biri olan Yeganə Quliyevanı daha yaxından tanıyaq
Bakıda 1981-ci ildə doğulan və İngilis dili Sinxron Tərcümə ixtisası üzrə təhsil alan Yeganə Quliyeva, 2001-ci ildə ailəsi ilə birlikdə İstanbula köçərək iş həyatına atılıb. Onun gənc yaşlarından media sahəsində göstərdiyi fəallıq və liderlik bacarığı, qadın gücünün sərhədsizliyini bir daha sübut edir.
Quliyevanın karyerası UHA-Beynəlxalq Xəbər Agentliyində başlayıb və onu Kanal 7, ATV, STAR TV, TRT kimi milli telekanallarda koordinator və reklam meneceri vəzifələrinə gətirib. O, vətənpərvərliyini heç vaxt unutmayaraq, çalışdığı media qurumlarında ilk Azərbaycan promosyonlarının hazırlanmasına və TRT ekranlarında yayımlanmasına nail olub. Bu addım, iki qardaş ölkə arasında mədəni körpülərin qurulmasında mühüm rol oynayıb.
2017-ci il Yeganə Quliyevanın həyatında yeni bir səhifə açıb. O, sahibkarlıq ruhunu ön plana çıxararaq TurkAz PR&Event və TurkAz Magazine nəşrlərinin sahibi olub. TurkAz Magazine Türkiyə ilə Azərbaycan arasında ilk ortaq media nəşri kimi fəaliyyətə başlayıb. Bu jurnal, iki ölkənin bir-birinə daha da yaxınlaşmasına, tarixlərinin və mədəniyyətlərinin təbliğinə, iş birliyinin inkişafına xidmət edir. Jurnalın Bakıda keçirilən təqdimat mərasimi hər iki ölkənin iş adamlarını bir araya gətirərək, medianın gücünü və qardaşlıq bağlarının əhəmiyyətini bir daha nümayiş etdirib.
TurkAz Kommunikasiya Məsləhət Xidmətləri isə brend idarəetməsi, media əlaqələri və korporativ tədbirlərin təşkili sahəsində Türkiyə və Azərbaycanda bir çox şirkətə xidmət göstərərək ölkələrarası əməkdaşlığa töhfə verir.
Yeganə Quliyevanın fəaliyyətinin ən parlaq nümunələrindən biri 2022-ci ildə yaratdığı TurkAz İş Qadınları Platformasıdır. Bu platforma Türkiyə və Azərbaycan iş qadınlarını bir araya gətirmək və sahibkarlığı dəstəkləmək məqsədilə yaradılsa da, qısa zamanda bütün Türk Dünyasını əhatə edən genişmiqyaslı bir hərəkata çevrilib.
Quliyeva hazırda Azərbaycan İqtisadiyyat Nazirliyinin nəzdində yaradılmış AQSİA-nın Türkiyə Nümayəndəsi, Türk Dövlətləri Təşkilatı və TOBB çərçivəsində Türkiyə Ticarət və Sənaye Qadınlar Şurasının DLG Azərbaycan nümayəndəsi kimi fəaliyyət göstərir. Onun bu fəaliyyəti Türk dünyası qadınlarının iqtisadi müstəqilliyinin və cəmiyyətdəki rolunun güclənməsinə yönəlib.
Yeganə Quliyeva öz fəaliyyəti ilə “sahibkarlıq bir ruhdur” fəlsəfəsini təcəssüm etdirir. O, iddia edir ki, sahibkarlıq yıxılanda yenidən ayağa qalxmaq, uğursuzluğa düçar olanda yenidən cəhd etmək, lakin əsla təslim olmamaq ruhudur. Onun fikrincə, sahibkarlıq innovasiya ilə birləşdikdə ideyalar ticarətə çevrilir və bu, iqtisadiyyatın inkişafına böyük töhfə verir.
“Qadın gücü” ifadəsi Yeganə Quliyevanın fəlsəfəsinin əsasını təşkil edir. O, qadının təbiətən güc və dəyər olaraq yaradıldığını vurğulayır. Qadınların ikinci plana atılmasının ölkə üçün itki olduğunu bildirərək, onların əmək, yenilik, cəsarət və güc mənbəyi olduğunu xatırladır. Quliyeva qeyd edir ki, qadınlar istəsə həm evdə, həm də iş həyatında yüksək uğurlar qazana bilər. Qadın və kişinin bir quşun iki qanadı kimi bütöv olduğunu vurğulayaraq, bərabərliyin cəmiyyətin və dövlətin inkişafı üçün vacibliyini bildirir: “Quş bir qanadla uça bilmədiyi kimi, qadın və kişi bir bütündür.”
Yeganə Quliyeva öz çıxışlarında Azərbaycanın mənafeyinə xidmət etmək missiyasını hər zaman ön planda saxlayıb. 26 Fevral 1992-ci il Xocalı soyqırımını dərin ağrı və qətiyyətlə xatırlayır. O, bu vəhşiliyin təkcə Azərbaycanın deyil, bütün Türk Dünyasının dərdi olduğunu vurğulayır. “Xocalı soyqırımı insanlığa qarşı ən böyük vəhşilik, qətldir,” deyən Quliyeva, erməni lobbisinin yalanlarına qarşı duraraq, Türk xalqının haqq səsini dünyaya çatdırmağın vacibliyini dilə gətirir. O, Xocalının ildə sadəcə iki gün deyil, 365 gün xatırlanmasının zəruriliyini qeyd edir və Türkiyənin bu ağrılı günü öz ağrısı kimi qəbul etməsinin Türk Birliyinin güclənməsi üçün vacib olduğunu vurğulayır. “Davamız bir, savaşımız bir, xalqımız bir, dilimiz bir, dərdimiz bir olmalıdır. Biz ancaq belə güclü ola bilərik,” deyərək Türk dünyasının birliyinin zəruriliyini önə çəkir.
Yeganə Quliyeva təkcə Türkiyə və Azərbaycan arasında deyil, bütün Türk Dünyasında qadın sahibkarlığı və media əlaqələrinin inkişafı üçün yorulmadan çalışan bir liderdir. Onun fəaliyyəti Türk xalqları arasında ortaq dəyərlərin möhkəmləndirilməsinə və iqtisadi əməkdaşlığın dərinləşməsinə xidmət edir.
Quliyevanın Türk Dünyası səviyyəsindəki əlaqələri, xüsusilə də onun rəsmi vəzifələri vasitəsilə daha da genişlənir. O, hazırda Azərbaycan İqtisadiyyat Nazirliyinin nəzdində yaradılmış AQSİA-nın Türkiyə nümayəndəsi və Türk Dövlətləri Təşkilatı (TDT) ilə Türkiyə Odalar və Borsalar Birliyi (TOBB) çərçivəsindəki Türkiyə Ticarət və Sənaye Qadınlar Şurasının DLG Azərbaycan nümayəndəsi kimi mühüm rollar icra edir. Bu vəzifələr ona bütün Türk Dünyasından olan iş qadınlarını bir araya gətirmək, onların işgüzar əlaqələrini dəstəkləmək və potensial əməkdaşlıq layihələrini təşviq etmək imkanı verir.
Quliyeva qadınların və gənclərin cəmiyyətdəki rolunun gücləndirilməsinə də böyük diqqət yetirir. Onun fikrincə, “qadınlar əməkdir, qadınlar yenilik, cəsarət və gücdür.” O, bu prinsiplər əsasında gələcəkdə daha çox maarifləndirici layihələrə və sosial məsuliyyət tədbirlərinə imza atmağı planlaşdırır.
Yeganə Quliyeva, “cəhd etməmək ən böyük uğursuzluqdur” prinsipinə sadiq qalaraq, Türk Dünyasında qadınların və sahibkarlığın yüksəlişi üçün öz zərif çiyinlərində böyük bir missiyanı inamla daşıyır. Onun hər bir addımı, birliyə, inkişafa və parlaq gələcəyə atılan addımdır.
Parlaq gələcəyimizin inkişafı üçün göstərdiyiniz yüksək nəticələr ,yüksək səviyyədə təşkil olunan yüksəliş yönümlü addımlarınızda , genişmiqyaslı siyasi yolunuzda uğurlar arzulayırıq.
YENİNEWSTV24.AZ
Aygün Məmmədova Azərbaycan Jurnalistlər Birliyinin üzvü
