Siyasi və dövlət quruculuğu sahəsində əsl vətənpərvərlik nümunələri göstərmiş Azərbaycan qadınları Haqqında tarixi mənbələrdə, yazılı və şifahi xalq yaradıcılıq nümunələrində, dastanlarımızda qürurduyulası faktlara rast gəlirik. Onların cəsurluğu, qorxmazlığı, qayğıkeşliyi, mərdliyi, qeyrəti bu gün uşaq və yeniyetmələrin vətənpərvərlik ruhunda tərbiyəsində böyük əhəmiyyət kəsb edir. Qadınlarımızın yüksəldiyi zirvə isə uzaq keçmişin mürəkkəb və təlatümlü hadisələrindən başlanıb.Azərbaycan qadını tarixdə bir çox çətin sınaqlardan keçməli olub. İgid oğullarla yanaşı, qadınlar da el-obasının qeyrətini çəkib. Elin yağı düşməninə qarşı döyüşlərdə bilavasitə iştirak ediblər. Ailəsində olduğu kimi, savaşlarda da fədakarlıq və qəhrəmanlıq nümunələri sərgiləyiblər. Yeri gəlib həyat yoldaşlarını, oğullarını, qardaşlarını əvəz edib. Torpaqlarımıza göz dikən məkrli düşmənlərə öz dərin zəkası, ağlı ilə layiqli cavab verib, at minib, müxtəlif silahlarla silahlanıb, qəhrəmanlıq göstəriblər.Şanlı tariximizi vərəqləyərkən cəsur, qayğıkeş, mətanətli Azərbaycan qadınını dövrünün hər cür əzab-əziyyətinin, fiziki və mənəvi zülm və əsarətin içində olduğunu, lakin öz ağılı, zəkası, biliyi, istedadı sayəsində qalib çıxdığının şahidi oluruq. Zaman keçdikcə əllərindəki soyuq silahlarını, biliyin silahı ilə əvəz etdiklərini, istedadları sayəsində uğur və nailiyyətlərə imza atdıqlarını, hədəf və ideyalarını həyata keçirdiklərini görürük. Həyatları bahasına da olsa, nəfəslərinin son anına qədər xalqının ictimai həyatında fəallıq göstərən maarifpərvər qadınlar ölkədə qadın hüquqları uğrunda mübarizə aparıblar. Dövrünün ictimai, siyasi, publisistik və başqa sahələrində çalışan ziyalı xanımlardan Şəfiqə Əfəndizadə, Nigar Şıxlinskaya, Xədicə Ağayeva, Fatma Topçubaşova, Pəri Topçubaşova, Sürəyya Axundova, Əminə Ağayeva, Mədinə Qiyasbəyli, Mina Aslanova, İsmət Aşurbəyova, Gövhər Vəlibəyova, Suğra Yaqubova, Xeyrənsə Rəhimova, Fatma İsmayılova, Raziyyə Əliyeva və digərləri qadınları yeni cəmiyyət quruculuğu uğrunda mübarizəyə cəlb etməkdə tarixi rol oynayıblar. Onlar qadınların maariflənməsi, ictimai fəallığının artırılması sahəsində böyük işlər görməklə yanaşı, on minlərlə qadınları da öz arxasınca aparıb, onlara nümunə olublar.Vətəninin, millətinin qeyrətini çəkən, onun inkişafı naminə fədakarcasına mübarizə aparan Azərbaycan qadınları əsrlər boyu buraxdıqları izlərilə bu gün də şanlı tariximizdə yaşamaqdadır. Azərbaycan xanımı Möminə xatun Azərbaycan Atabəyləri ilə aparılan ara müharibələrinin qarşısını almış, Bütün Şərqdə tanınan Məhsəti Gəncəvi dərin hikmətli rübailəri ilə xalqına öz analıq tövsiyyələrini bildirmiş, ilk səfir qadınlarımız Uzun Həsənin anası Sara xatun və gəlini Dəspinə xatun ilə birlikdə öz missiyalarını ləyaqətlə yerinə yetirərək, Həcər qeyrətli ,Nigar vüqarlı, dünyaya Azərbaycan xanımının hansı gücə malik olduğunu sübuta yetirmişlər.Xan qızı Natəvan həm apardığı siyasəti ilə, həm də xeyriyyəçilik əməlləri və lirik şerləri ilə xalqının sevimlisi olmuşdur. Beləliklə, tarixlər boyu sübut olunmuşdur ki, Azərbaycan qadını cəmiyyətdə yalnız ailə mühiti ilə məhdudlaşmayıb, o cümlədən, ictimai həyatda da daim fəal olduqlarından daim layiqli mövqeyə sahiblik edib. İllər, qərinələr keçdikcə, qadınlarımızın sosial-mədəni mühitdə fəaliyyəti daha da artmış, siyasət, elm, tibb, mədəniyyət və digər bir çox sahələr üzrə ən yüksək nailiyyətlər qazanmış, ali mərtəbələrədək ucalmışlar. Xüsusən, elm və bilik aləmində elə qadın şəxsiyyətlərimiz var ki, onların gətirdikləri əsrarəngiz yeniliklər dünya miqyasında qəbul edilmiş və çox yüksək dəyərləndirilmişdir. Buna misal kimi Azərbaycan Milli Elmlər Akademiyasını göstərmək olar. Bu ali nüfuz ocağının 50 faizindən çoxunu qadınlar təşkil edir. Onların 1000 nəfərdən artıq nümayəndəsi elmi dərəcələri olan alim qadınlarımızdır. Azərbaycan qadını ana olmaqla yanaşı, həm də bacarıqlı siyasətçi, iş adamı, dövlət məmuru, xalqın inanıb səs verdiyi deputatdır. Bu fəallıq Azərbaycan qadınının malik olduğu tarixi ənənələrlə yanaşı, ölkəmizdə həyata keçirilən gender siyasətinin mahiyyətindən, onlara cəmiyyətin tamhüquqlu üzvü kimi bütün imkanlardan bərabər istifadə üçün zəruri şəraitin yaradılmasından irəli gəlir. Respublikamız həm də qadın hərəkatının inkişaf etdiyi dövlətlərdən biridir. Ölkəmizdə qadın hərəkatının formalaşmasında, Azərbaycan qadınının yüksək dəyərlərə bağlılığının dünyaya tanıdılmasında respublikamızın Birinci vitse-prezidenti, Heydər Əliyev Fondunun prezidenti, Yeni Azərbaycan Partiyası Sədrinin birinci müavini Mehriban Əliyevanın xidmətləri xüsusi vurğulanmalıdır. Öz müdrikliyi, nüfuzu və zəkası, eləcə də incəlik və qətiyyəti ilə Qadınlarımız dövlət quruculuğu prosesində, parlament və icra strukturlarında, elm və mədəniyyət sahələrində yeni-yeni nailiyyətlərə və uğurlara imza atır. Azərbaycan qadınlarının ictimai fəallığı elə bir səviyyəyə qalxmışdır ki, bütöv bir qadın hərəkatını xatırladır. Əminliklə deyə bilərik ki, bu hərəkatın aparıcı siması, insanlıq nümunəsi Azərbaycanın birinci xanımı Mehriban xanım Əliyevadır. YUNESKO və İSESKO kimi mötəbər beynəlxalq təşkilatların xətti ilə Mehriban xanım Əliyeva Azərbaycan mədəniyyəti tarixinin səsini planetin ən ucqar guşələrinə belə çatdırmışdır. Azərbaycanın adət-ənənələrinin qoruyucusu, ümummilli problemlərimizin dünya müstəvisinə çıxarılmasında əvəzsiz xidmətləri olan Mehriban xanım Əliyeva ölkə daxilində və xaricdə keçirdiyi görüşlərdə dərin biliyə, geniş intellektə malik olduğunu hər dəfə nümayiş etdirməklə böyük nüfuz qazanmışdır. Azərbaycan qadınları üçün bu bir nümunədir. Mehriban xanım Əliyeva YAP-ın Sədr müavini kimi yüksək siyasi potensiala malik olduğunu da əməli fəaliyyətində təsdiqləyib. Belə ki, 2004-cü ildən Yeni Azərbaycan Partiyası Siyasi Şurasının üzvü, 2013-cü ildən partiyanın Sədr müavinidir. 2005 və 2010-cu illərdə Azərbaycan Respublikasının Milli Məclisinə keçirilən seçkilərdə namizədliyi Yeni Azərbaycan Partiyası tərəfindən 14 saylı Xəzər ikinci seçki dairəsindən irəli sürülmüş Mehriban Əliyeva müvafiq olaraq 92,12% (23106 səs) və 94,49% (31797 səs) səs toplayaraq millət vəkili seçilib. Mehriban xanım Əliyeva həm də həyat yoldaşına sədaqətli, arxa-kömək olan, üç gözəl, yüksək intellektə, əxlaqa malik övladlara sahib olan bir anadır. Onun ictimai-siyasi fəaliyyəti cənab İlham Əliyevin uğurla həyata keçirdiyi ümummilli siyasətin ayrılmaz hissəsidir. Mehriban xanım Prezident İlham Əliyevin ən yaxın və etibarlı silahdaşı olaraq Azərbaycanın tərəqqi sütunlarının daha da möhkəmlənməsində tükənməz əmək sərf edən nümunəvi şəxsiyyətdir. Xanım Mehriban Əliyeva əsil-nəsilli ziyallı ailədə doğulub-böyümüş, mükəmməl təlim-tərbiyə almışdır. Gənc yaşından isə Ulu Öndər Heydər Əliyev kimi dövlət xadiminin ailəsində mənimsədiyi siyasi təlim və əhatəli sosial baxış, akademik Zərifə xanım Əliyevadan əxz etdiyi sakit ruhlu ,savadlı , dünyagörüşlü, sevgi dolu, ictimai-mədəni davranış, insani nəciblik və mərhəməti həyat tərzi, görkəmli yazıçı Mir Cəlal və ustad jurnalist Nəsir İmanquliyev babalarından görüb-götürdüyü milli ziyalılıq düşüncəsi, akademik Arif Paşayev və professor Aida İmanquliyeva valideynlərindən aldığı nümunəvi ailə tərbiyəsi Xanım Mehriban Əliyevanın illər boyu formalaşan ictimai-siyasi mədəni təməli olmuşdur. Həqiqətən də çox gözəl mötəbər, nəcib savadlı ciddi və gözəl ürəkli, ziyallı dünya şöhrətli insanın gəlini çox geniş mənəviyyata, dünya görüşlü, humanist, vətənpərvər Xanım Mehriban Əliyevanın qadın lider olaraq formalaşması və yüksəlməsi həm daxili istedadı, bacarığı, mükəmməl təhsili, praqmatik zəkası, həm də taleyinə yazılmış ulu öndər Heydər Əliyev kimi böyük strateqin həyat və siyasət məktəbindən yetərli dərs alması olmuşdur. Azərbaycanın Birinci Xanımının düşüncəsində: “Ulu öndər Heydər Əliyev müdrik, güclü, cəsarətli, nəhəng intellektə və yenilməz iradəyə malik olan insan idi. Eyni zamanda, onun ailə üzvü olaraq demək istərdim ki, o, çox xeyirxah, mərhəmətli və humanist insan idi. Adi insanla münasibətdə o, çox sadə və ədalətli idi.” Ulu Öndər Heydər Əliyev Azərbaycanda hakimiyyətinin ilk dönəmində də, qadınlarla bağlı məsələləri daim diqqət mərkəzində saxlamışdır. O vaxtlar da qadın problemləri, qadınların inkişafı, onların irəli çəkilməsi haqqında dünya miqyasında söhbətlər gedirdi. Elə həmin dövrdə ümummilli lider Heydər Əliyev qadınlara diqqət və qayğı göstərərək, onları bilik və bacarıqlarına, istedad və intellektinə görə irəli çəkməyə, yüksək vəzifələrə təyin etməyə başlamışdı. O dövrdə bir çox rayonlara rəhbərlik qadınlara tapşırılmışdı. Vəzifəlilər – nazir müavinləri, hətta nazirlər arasında neçə-neçə qadın var idi. Respublikamızın tarixində ilk dəfə olaraq ali məktəblərə qadın rektorlar təyin edildi. Ümummilli liderimiz hələ o dövrdə öz işində, ictimai fəaliyyətində fərqlənən qadınlara fəxri adların verilməsinə, qadınların mükafatlandırılmasında, orden-medallarla təltif olunmasında səyini əsirgəmədi. Həmin illərdə neçə-neçə qadın “Sosialist Əməyi Qəhrəmanı”, “Qəhrəman ana” fəxri adlarını aldı. Bütün bunlar ölkə başçısının xalqına göstərdiyi sonsuz diqqət və qayğının nəticəsi idi. Xanım Mehriban Əliyevanın istər ölkəmizdə, istərsə də beynəlxalq aləmdə qazandığı böyük nüfuz, dövlətçiliyin yüksəlişində praqmatik dəstəyi, sosial-mədəni tərəqqidə işgüzar mövqeyi onun ulu öndər Heydər Əliyevin dövlətçilik institutunun sadiq və bacarıqlı yetirməsi olduğunu təsdiq etmişdir. Xanım Mehriban Əliyeva “Həyat dərsi” məqaləsində ümummilli lider Heydər Əliyev məktəbinin mükəmməlliyi ilə bağlı söyləyir: “Heydər Əliyevin dərslərinin mahiyyətini onun həmyaşıdları bu gün də öyrənirlər. Heydər Əliyev tarix salnaməsinin XX əsr üçün taleyüklü səhifələrinin iştirakçısı, yaradıcısı, aparıcısı, 30 ildən artıq Azərbaycanın məsuliyyətini öz çiyinlərində daşıyan, onu bir dövlət və millət kimi tarixin sınaqlarından çıxaran vətəndaş, şəxsiyyət, liderdir. Vətənin – Azərbaycanın taleyi onun adı ilə bağlıdı”. Xanım Mehriban Əliyevanın rəhbərliyi ilə Heydər Əliyev Fondu dünyada öz çoxmiqyaslı, xeyirxah fəaliyyəti ilə seçilən, böyük layihələrə imza atan vətəndaş cəmiyyəti qurumudur. Ulu Öndərin adını, onun ideya və əməllərini daşıyan, ölkədə və dünyada səhiyyə, təhsil, elm, mədəniyyət, mənəviyyat sahəsində müxtəlif səpkili tədbirləri gerçəkləşdirməklə, dövlət siyasətinin həyata keçirilməsində ictimai qurum kimi böyük bir nüfuz qazanmışdır. Birinci vitse-prezidentin “Sizin Mehriban” imzası ilə xalqa müraciətlərindəki səmimilik, vətənsevərlik, qayğıkeşlik duyğusu hər bir Azərbaycan vətəndaşına onu bir daha yaxınlaşdıraraq sevdirdi və “Bizim Mehriban xanım” adı milyonlarla qəlbə sevgi ilə yazıldı. Bu gün ictimai-sosial həyatımızın elə bir sahəsi yoxdur ki, Mehriban xanımın nəzərindən kənarda qalsın. Xalqın sosial-mədəni həyatında, səhiyyənin, təhsilin, idmanın inkişafında onun xidmətləri misilsizdir. Uşaqlara şəfqət, mərhəmət göstərilməsi, ailəyə, vətənə bağlılıq duyğuları aşılamaq onların tərbiyəsi, sağlam böyüməsi, böyüklərin sevgisi ilə əhatə olunması, gənclərin kamil bir vətəndaş kimi yetişməsi, onları vətənpərvər ruhda tərbiyə etmək – bütün bunlar Mehriban Əliyevanın daim diqqət mərkəzində olmuşdur. Yaşı 18-ə çatmış qızların uşaq evindən sonrakı taleyi bu gün cəmyyəti narahat edən məsələlərdəndir. Bunu nəzərə alan Heydər Əliyev Fondu internat həyatı başa çatan qızlar üçün yaşayış binası tikmişdir. Bu layihə müstəqil həyata qədəm qoyan qızların həyatını izləməklə bərabər, eyni zamanda onlara mənəvi dəstəyin ifadəsidir. Humanizmi, mərhəməti, xeyirxahlığı ilə həyata keçirdiyi genişəhatəli layihələr fəaliyyətinin başlıca meyarı olmuşdur. Mehriban xanımın bu layihələri böyük həssaslıqla, ən kiçik detallarına, incəliklərinə qədər izləməsi, proseslərin içərisində olması da onun özünəməxsus iş üslubuna, xarakterə malik olduğunun aydın göstəricisidir. Bütün bunları göz önünə alanda görürük ki, O, tarixdə yaşamış vətənpərvər, maarifpərvər qadınlarımızın örnək olan həyatını öz fəaliyyətində yeni anlamda, həm də ləyaqətlə davam etdirir. Bildiyimiz kimi, fondun əsas prioritet istiqamətlərindən biri səhiyyəyə yönəldilmiş diqqətdir. Səhiyyə ocaqlarının yeni, müasir tibbi avadanlıqlarla təchizatı, standartlara cavab verən aparatların xarici ölkələrdən Azərbaycana gətirilməsi və s. Azərbaycan səhiyyəsinin nailiyyətləridir. Müalicəsi çətin və böyük məbləğdə pul tələb edən xəstələrin fiziki sağlamlığını bərpa etmək fondun ən başlıca vəzifələrindəndir. Səhiyyə müəssisələrinin təmir və bərpa etdirilməsi, müasir avadanlıqlarla təchizat, müxtəlif yaş həddində olan insanlar üzərində cərrahiyyə əməliyyatlarının aparılması fondun xeyriyyəçilik missiyasının bir hissəsidir. Ümummilli Lider Heydər Əliyevin adını daşıyan, onun ideyalarının həyata keçirilməsini özünün əsas vəzifəsi hesab edən fondun həyata keçirdiyi “Diabetli uşaqlara ən yüksək qayğı” proqramı çərçivəsində görülən işlər, həyata keçirilən tədbirlər də xüsusilə önəmlidir. Qurum beynəlxalq təşkilatlarla sıx əməkdaşlıq yaradır, ölkəmizdə əhalinin sağlamlığı naminə onların imkanlarından da istifadə edir. Azərbaycan Diabet Cəmiyyəti və Danimarkanın yüksək keyfiyyətli insulin istehsalı sahəsində dünyada lider olan Novo-Nordisk şirkəti ilə birgə layihənin icrasına başlanandan bəri, Azərbaycanda bu xəstəliyə tutulmuş 14 yaşınadək 310 nəfər uşağın insulinlə təminatında əvvəllər mövcud olan problemlər aradan qaldırılmışdır. Özü də ixtisasca həkim olan Mehriban xanım Əliyeva səhiyyə sahəsində çalışanlara həmişə diqqət və qayğı göstərir, tibb işçilərinin əməyini və fədakarlığını daim yüksək qiymətləndirir. Birinci vitse-prezident Mehriban Əliyevanın “həkimlərin hər an qəbul etdikləri qərarlar, peşəkar bilik və bacarıqları, fədakarlıq və şəfqəti bizim əsas silahımız və ümidimizdir” söylədiyi fikirlər bu sahənin nümayəndələrinə əlavə stimul verir. Əhalinin sağlamlığı məsələsi də Mehriban Əliyevanın daim xüsusi diqqət göstərdiyi sahələrdəndir. Onun təşəbbüsü ilə reallaşdırılan “Talassemiyasız həyat naminə”, “Tibb müəssisələrinin yenidən qurulması və inşası” kimi bənzərsiz layihələr, bir çox xeyriyyə aksiyaları böyük rəğbətlə qarşılanır, öz müsbət nəticələrini verir. Bu çərçivədə Bakıda müasir Talassemiya Mərkəzi, Daun Sindromlu Şəxslərin Reabilitasiya Mərkəzi, Xüsusi qayğıya ehtiyacı olan uşaqlar üçün reabilitasiya Mərkəzi, Psixonevroloji Uşaq Mərkəzi və digər səhiyyə ocaqları inşa olunub və ya əsaslı şəkildə yenidən qurulub. Hamı onu humanizm və ədalət idealların carçısı, humanist aksiyaların simvolu kimi qəbul edir. Onun humanizminin və xeyirxahlığının əhatə dairəsi təkcə Azərbaycanla məhdudlaşmır, humanitar obrazı həm də dünyanın müxtəlif yerlərində xeyirxahlıqda və insana olan səmimi qayğıda birinci yerdə dayanır. Mehriban Əliyeva Müzəffər Ali Baş Komandanla birgə işğaldan azad edilmiş torpaqlarımızda aparılan sürətli bərpa və quruculuq işlərində yaxından iştirak edərək tarixi ərazilərimizin dirçəldilməsində, mədəniyyət paytaxtımız olan Şuşanın öz zəngin tarixi simasının özünə qaytarılmasında yorulmaz fədakarlığını əsirgəmir. Azərbaycanın Birinci vitse-prezidenti həm də cəmiyyətdə xeyirxahlıq, insanpərvərlik örnəyidir. Aztəminatlı ailələrə, Qarabağ qazilərinə, şəhid ailələrinə və həssas sosial qruplara xüsusi diqqət və qayğı göstərməklə onların sosial dayağına çevrilib.Heydər Əliyev Fondu bu kateqoriyadan olan insanların qayğıları ilə yaxından maraqlanır, onları narahat edən məsələlərin həlli istiqamətində mütəmadi tədbirlər həyata keçirir. Döyüşlərdə yaralanan hərbçilərimiz müalicə və reabilitasiya üçün Türkiyəyə göndərilib, həmçinin sağlamlıqlarını itirmiş bir qrup əsgər və zabit yüksək texnologiyalı protezlərlə təmin edilib. Torpaqlarımızın azad olunması uğrunda mübarizəyə siyasi-mənəvi dəstək, xalqımızı milli həmrəyliyə səsləyən, şanlı Ordumuzu Qələbəyə ruhlandıran müraciət və çağırışlar, müharıbədən sonra isə dövlətimizin başçısı ilə birlikdə Qarabağa çoxsaylı səfərlər, Şuşada möhtəşəm “Xarıbülbül” Musiqi Festivalının təşkili birinci xanımın xidmətləri sırasında xüsusi yer tutur. Eyni zamanda, Mehriban xanımın təşəbbüsü olan “Uşaq evləri və internat məktəblərinin inkişafı”, “Yeniləşən Azərbaycana yeni məktəb”, “Təhsilə dəstək”, “Məktəbəqədər təhsil müəssisələrinin inkişafı” və digər proqramlar təhsilin inkişafında mühüm rol oynayır. 2005-ci ildən icrasına başlanılan “Yeniləşən Azərbaycana yeni məktəb” proqramı çərçivəsində 100 mindən çox şagirdin təhsil aldığı 500-dən çox məktəb binası inşa olunub və yenidən qurulub. “Uşaq evləri və internat məktəblərinin inkişafı” proqramı çərçivəsində isə 40-dan çox uşaq müəssisəsi əsaslı təmir edilib. Birinci vitse-prezident Mehriban Əliyevanın fəaliyyətinin əsas istiqamətlərindən biri də əlilliyi olan şəxslərin reabilitasiyası və cəmiyyətə fəal inteqrasiyasının dəstəklənməsidir. Bunun nümunələri olaraq, onun təşəbbüsü və dəstəyi ilə əlilliyi olan uşaqlar üçün Bakının Yeni Günəşli yaşayış massivində yeni uşaq reabilitasiya müəssisəsi, həmin uşaqlar üçün sosial xidmət müəssisələrində müasir tələblərə uyğun yaşayış və reabilitasiya şəraiti, Naxçıvan, Gəncə və Yevlaxda məhdud fiziki imkanlı insanlar üçün regional informasiya mərkəzləri yaradılıb. 44 günlük Vətən müharibəsində qazandığımız qələbədə qadınlarımızın rolunu xüsusi qeyd etmək istərdim. Çünki Azərbaycan qadını bu zəfəri təmin edən igid oğulları yetişdirən, xalqımızın tarixdən süzülüb gələn qəhrəmanlıq ənənələrini öz övladlarına aşılayan, onları öz xeyir-duası ilə döyüşə yola salan böyük qüvvədir. Prezident İlham Əliyevin qeyd etdiyi kimi: “Azərbaycan qadını mərdlik və mətanət nümayiş etdirərək, dualarla cəbhəyə göndərib qələbə xəbəri ilə yolunu gözlədiyi və yurdumuzun hər qarışını canından əziz bilən bir nəsil yetişdirmişdir”. Azərbaycan qadını həm də şəhid anasıdır, şəhid bacısıdır, şəhid yoldaşıdır, şəhid övladıdır. Ona görə Azərbaycan qadınının başı hər zaman uca olacaq… Mehriban Əliyevanın təşəbbüsü ilə həyata keçirilən ideyaları, insanlıq amalı, vətənpərvərlik nümunəsi, hər bir azərbaycanlının istək və maraqlarına yaxın olması, siyasi uğurları hər bir Azərbaycanlının ürəyinə işıq salacaq. Mehriban Əliyeva gələcək nəsillərə örnək xanım simvolu olacaq!
YENİNEWSTV24.AZ
Bağırova Rəfiqə Məzahir qızı Azərbaycan İdman Akademiyasının “Sağlamlaşdırıcı idman və reabilitasiya” kafedrasının professoru, biologiya elmləri dokrotu, əməkdar müəllim