Azərbaycan təhsil sistemində peşəsinə sədaqəti, şagirdlərinə sevgisi və qayğısı ilə seçilən müəllimələr həmişə xüsusi hörmət qazanıb. Həmin dəyərli pedaqoqlardan biri də Abşeron-Xızı Regional Təhsil İdarəsinin tabeliyində fəaliyyət göstərən Masazır kənd 1 nömrəli tam orta məktəbin ibtidai sinif müəlliməsi İmanova Sevinc Sabir qızıdır.
Sevinc xanım 1981-ci ilin dekabr ayında dünyaya göz açıb. Onun müəlliməlik peşəsinə gəlişi isə təsadüfi olmayıb. Gənc yaşlarından elmə, təhsilə böyük maraq göstərib və müəlliməlik peşəsini seçib.
Sevinc xanımın pedaqoji fəaliyyətə ilk addımı 2005-ci ildə Masazır kənd 1 nömrəli tam orta məktəbdə olub. O, həmin məktəbdə ibtidai sinif müəlliməsi kimi işə başlayaraq peşəsinə sevgi və fədakarlıqla yanaşıb. Qısa müddətdə həm şagirdlərinin, həm də müəllimə kollektivinin dərin rəğbətini qazanıb. Onun məsuliyyətli, prinsipial və humanist yanaşması sayəsində 2012-ci ildə dərs hissə müdiri vəzifəsinə təyin edilib.
Sevinc İmanova müəlliməlik fəaliyyətində daim dövlətinə və şagirdlərinə sadiq olub. Onun dərs dediyi illərdə yüzlərlə şagird onun sevgisini, diqqətini və qayğısını hiss edib. Şagirdlərinin uğurlarını öz nailiyyəti kimi dəyərləndirən müəllimə, onların həyat yolunda həm elmi, həm də mənəvi dayaq olub.
Sevinc xanımın yetişdirdiyi bir çox şagirdlər bu gün müxtəlif dövlət qurumlarında məsul vəzifələrdə çalışır, yüksək rütbələrə layiq görülürlər. Onlar müəllimələrinin zəhmətini heç vaxt unutmur, Sevinc xanımı həyat yollarında bir bələdçi kimi xatırlayırlar.
Sevinc İmanova pedaqoq olmaqla yanaşı, şagirdlərinin həyatda dayağı olub. Maddi və mənəvi ehtiyac duyduqları məqamlarda onların yanında dayanaraq, hər zaman dəstək göstərib. O, dərslərində yalnız ibtidai bilikləri öyrətməklə kifayətlənməyib, eyni zamanda şagirdlərə həyat məktəbi, insanlıq dərsi keçib.
Onun humanistliyi, səbrli yanaşması və fədakarlığı nəticəsində o, həm şagirdlərin, həm də valideynlərin dərin hörmətini qazanıb.
Sevinc xanımın pedaqoji fəaliyyəti göstərir ki, o, gələcəkdə də təhsil sistemimizdə daha yüksək vəzifələrdə çalışmağa layiqdir. Biz inanırıq ki, belə savadlı, fədakar və sadiq müəllimələr bir gün məktəb direktorları sırasında da yer alacaqlar. Bu, təkcə Sevinc xanımın haqqı deyil, həm də Azərbaycan təhsilinə veriləcək böyük bir töhfədir.
Sevinc Sabir qızı İmanova – pedaqoji fəaliyyəti ilə yalnız dərs keçən müəllimə deyil, həm də şagirdlərinə həyat sevgisi, insanlıq və vətənpərvərlik aşılamağı bacaran bir ziyalıdır. Onun simasında biz Azərbaycan müəlliməsinin bütün dəyərlərini görürük: savad, fədakarlıq, humanizm və vətənə sədaqət.
Xüsusi.Tv olaraq biz də arzu edirik ki, Sevinc xanım kimi müəllimələrin əməyi layiqincə qiymətləndirilsin və onların uğurları gələcək nəsillərə örnək olsun.
YENİNEWSTV24.AZ