Azərbaycanın tarixində silinməz izlər buraxan, vətən uğrunda canından keçən igidlərdən
biri də snayper əsgər Cavanşir Əhmədovdur. O, düşmənin nəfəsini kəsən sərrast atəşi,
sarsılmaz ruhu və səssiz xidməti ilə müharibənin görünməyən, amma ən təsirli
simalarından biri oldu. Onun adı təkcə şəhidlər siyahısında deyil – qalib xalqın
yaddaşında əbədi həkk olunub.
Məqsədi uşaq yaşlarından bəlli idi
1999-cu ilin noyabr ayında Ələt qəsəbəsində dünyaya gələn Cavanşir uşaqlıqdan
fərqlənirdi. O, döyüş oyunları ilə yox, real hərbi biliklərə marağı ilə seçilirdi. Gənc
yaşlarından atıcılıq sənətinə həvəsi onu xüsusi kurslara yönləndirdi. Təkcə öyrənməklə
kifayətlənmədi – zamanla özü də başqalarına təlim verməyə başladı. Snayperlik onun
üçün sadəcə silahla atəş açmaq deyildi – bu, intizam, səbir və məsuliyyət tələb edən bir
sənət idi. O bu sənəti sevdiyi qədər, vətəni də sevirdi.
Xidmətə deyil, missiyaya getdi
2020-ci ilin iyulunda hərbi xidmətə çağırılan Cavanşir, qısa müddətdə öz bacarıqları ilə
fərqləndi və xüsusi təyinatlı dəstənin sıralarına daxil edildi. “Andiçmə” mərasimindən sonra Cavanşir sevinclə evə zəng edir və qardaşına xüsusi təyinatlı qüvvələrə seçildiyini bildirir. 2020-ci il Sentyabrın 27-də 44 günlük Vətən müharibəsi başlayır.Müharibə başlayanda isə
artıq o, Vətən müharibəsinin ən çətin məqamlarında aktiv iştirak edən əsgərlərdən biri idi. Döyüş meydanında səssiz idi, amma hər atəşi düşmən üçün sarsıdıcı olurdu.
Onun iştirak etdiyi döyüşlərin coğrafiyası genişdi: Murovdağın sərt qayalarından tutmuş
Cəbrayılın düzlərinə, Zəngilanın meşələrindən Hadrutun dağ yollarına qədər. Hər yerdə iz
qoydu, hər yerdə düşmənin planlarını pozdu.
Xocavənd – sonuncu, lakin şərəfli dayanacaq
Müharibənin ən ağır mərhələlərindən biri Xocavənd istiqamətində baş verdi. Cavanşir
burada da ön sıralarda döyüşürdü. 15 oktyabr 2020-ci ildə – öz peşəkarlığı və vətənə
bağlılığı ilə yüzlərlə döyüş yoldaşının həyatını xilas etdikdən sonra, özü şəhidlik zirvəsinə
ucaldı. Onun şəhidliyi təkcə bir ailənin deyil, bir xalqın ürəyini ağrıtdı – amma başımızı
da ucaltdı.
Şəhidimizin məzarı Ələt qəsəbəsində yerləşir.
Xaricdə də tanınan qəhrəman
Cavanşirin döyüş yolu və göstərdiyi qəhrəmanlıq yalnız ölkəmizdə deyil, xaricdə də
dəyərləndirildi. Rusiya mətbuatında – xüsusilə “Vestnik Kavkaza” nəşrində onun
haqqında geniş yazılar yayımlandı. O, Azərbaycan əsgərinin gücünü və peşəkarlığını
beynəlxalq auditoriyaya tanıdan simalardan biri oldu.
Adı yaddaşlarda, izi torpaqda qalacaq
Cavanşir Əhmədovun həyat yolu gənc nəsil üçün nümunədir. O, heç vaxt məşhur olmaq,
ad çıxarmaq üçün döyüşmədi. O, sadəcə sevdiyi torpaq üçün yaşadı və o torpaq üçün
canını verdi. Onun haqqında danışarkən, yalnız snayper bacarığından yox, həm də
insanlıqdan, sədaqətdən və vicdanlı əsgər anlayışından bəhs edirik.
Cavanşir Əhmədov ölümündən sonra prezident İlham Əliyevin sərəncamı ilə “Azərbaycan Bayrağı” ordeni,”Vətən uğrunda”, “Cəsur döyüşçü”, ” Kəlbəcərin azad olunmasına görə”, “Cəbrayılın azad olunmasına görə”, “Xocavəndin azad olunmasına görə”, “Füzulinin azad olunmasına görə” medalları ilə təltif edilmişdir.
Azərbaycan torpağı belə oğulların sayəsində azaddır. Cavanşir kimi igidlər unudulmur –
onların adı daşlara deyil, qəlblərə yazılır. Bu torpaq onun ayaq izlərini, bu xalq isə onun
ruhunu heç vaxt unutmayacaq.
YENİNEWSTV24.AZ
Sona Qubeysqızı
