Hər il sentyabrın 15-i gələcəyə doğru atılan addımların başlanğıcıdır.Bilik Günü, təkcə yeni dərslərin başladığı bir tarix deyil, həm də arzuların, xəyalların və ümidlərin yeniləndiyi bir gündür. Məktəbin qapıları açıldıqda sanki böyük bir dünyaya açılan qapıların sədası eşidilir. Bu dünyada qələm, kitab və məktəb çantası uşaqlarımızın ən yaxın dostuna çevrilir. Hər bir dərs, onların zəkalarını cilalayır, düşüncələrini inkişaf etdirir.
Ümumiyyətlə tarix boyu elmə, biliyə yiyələnmək şərəfli iş hesab olunub. Müəllim əməyinin nəticəsində formalaşan cəmiyyətdə savadlı, bilikli, geniş dünyagörüşlü, nümunəvi əxlaqa malik insanlar yetişir. Bu insanlar isə cəmiyyəti daha da inkişaf etdirirlər.
Hər zaman xalqımız elmi, biliyi yüksək qiymətləndirib, öz övladlarının savadlanması üçün əllərindən gələn səyi əsirgəməyib. Azərbaycan elminin tarixində Nəsirəddin Tusi, Bəhmənyar, Abbasqulu Ağa Bakıxanov, Mirzə Kazımbəy, Yusif Məmmədəliyev kimi yüzlərlə nəhəng alim və filosoflar olub ki, onlar dünya elminin inkişafına öz töhfələrini veriblər.
Son illərdə Azərbaycan təhsili yeni inkişaf dövrünə qədəm qoyub. Prezident İlham Əliyevin qayğısı, Heydər Əliyev Fondunun həyata keçirdiyi layihələr Ulu Öndər Heydər Əliyevin təhsil siyasətinin ugurlu davamının göstəricisidir. Bundan başqa, bu il bizim üçün daha da şərəflidir ,çünki,30 il sonra işğaldan azad olunmuş torpaqlarımızda inşa olunan yeni tədris mərkəzləri, Qarabağ Universiteti və təhsil ocaqları öz işlərini davam etdirəcəklər.Bilik günü Qarabağ Universitetində Tibb və sağlamlıq elmləri fakültəsi fəaliyyətə başlayıb. Fakültənin tədris korpusu müasir tələblərə cavab verən avadanlıqla təchiz edilib. Binada 10 dərs və 9 auditoriya otağı, 3 laboratoriya, iş və imtahan otaqları, istirahət zonaları, kitabxana, brifinq zalları yaradılıb. Burada, həmçinin mikrobiologiya, histologiya laboratoriyaları, hüceyrə yetişdirmə və digər inzibati otaqlar fəaliyyət göstərəcək. Fakültədə yerli və xarici ekspertlərin birgə hazırladığı, beynəlxalq təcrübələrə əsaslanan altıillik tibb və dördillik tibb bacısı proqramlarının tədrisi həyata keçiriləcək. Burada tətbiq olunacaq müasir təhsil modeli tələbələrin nəzəri biliklərini Qarabağ Universitetinin Klinikasında praktik vərdişlərə çevirməyə imkan yaradacaq. Tələbələrə tədqiqat aparmaq və liderlik keyfiyyətlərini inkişaf etdirmək üçün də hərtərəfli imkanlar veriləcək. Fakültənin fərqli xüsusiyyətlərindən biri isə seçmə fənn olaraq incəsənət proqramının tədris planına daxil edilməsidir. İncəsənət tələbələrin özünü ifadə, qrup daxilində əməkdaşlıq və ünsiyyət bacarıqlarının inkişafı baxımından mühüm əhəmiyyət kəsb edir.
Məktəb illəri, insan həyatının ən yaddaqalan dövrüdür. Dostluqlar yaranır, ilk sevinclər və kədərlər yaşanır. Kitab səhifələri arasında gizlənən bilik, uşaqlarımızı böyük bir səyahətə aparır. Bu səyahət, onların şəxsiyyətini formalaşdırır, onlara doğru yolu göstərir.
Azərbaycanda yeni tədris ilində 2,2 milyon təhsil alan olacaq.
2025/2026-cı tədris ilində 130 mindən çox uşaq 1-ci sinifdə təhsil alacaq.
Yeni tədris ilində ali təhsilin bütün səviyyələrinə 75 min tələbə qəbul olunub
Bu müqəddəs yolda onlara bələdçilik edən isə dəyərli müəllimlərimizdir. Müəllim, sadəcə bilik ötürən deyil, həm də gələcəyin memarıdır. Onlar hər bir şagirdin qəlbinə nur saçır, onları cəsarətli və bilikli insanlar kimi yetişdirirlər.Xatırladaq ki,bu gün ümumi təhsil müəssisələrində ilk dərs “Konstitusiya və Suverenlik İli”nə həsr olunacaq.
Siz, hörmətli müəllimlər, bu ocağın bilik və işıqla dolu ocağını qoruyan, nəsildən-nəslə ötürən müqəddəs simalarısınız. Sizin əməyiniz, sizin fədakarlığınız saysız-hesabsız gənclərin həyatına yön verir. Siz onlara sadəcə bilik deyil, həm də həyat yollarını cəsarətlə addımlamaq üçün gərəkli olan mənəvi dəyərləri öyrədirsiniz. Sizin sayənizdə neçə-neçə gənc Azərbaycan elminin, mədəniyyətinin və ictimai həyatının inkişafına töhfə verəcəkdir.
Azərbaycan müəllimi tarixin bütün mərhələlərində öz maarifçilik missiyasının öhdəsindən böyük fədakarlıq və şərəflə gəlib. Məhz Azərbaycan müəllimi müasir Zəfər tariximizin qəhrəmanlarını – vətənpərvər gəncliyi yetişdirib. Məhz bu gənclik ölkəmizin ərazi bütövlüyünün, suverenliyinin bərpası yolunda öz canından keçib.
İnanırıq ki, Azərbaycan müəllimi yenə də vətənpərvər gənc nəslin yetişdirilməsində öz missiyasına sadiq qalacaq, ölkəmizin tərəqqisi və çiçəklənməsi yolunda bilikli, savadlı, yüksək intellektli yeni nəslin hazırlanmasına öz töhfələrini verəcək.
Əziz şagirdlər, bu gün sizin üçün yeni səhifə açılır. Bu səhifəni yazmaq, onu rəngləmək sizin əlinizdədir. Dərslərinizə cəmiyyətə faydalı bir insan olmaq arzusu ilə başlayın. Yalnız biliklə deyil, həm də vicdanla, mərhəmətlə və xeyirxahlıqla zənginləşin. Bu gün, bütün cəmiyyətimiz üçün bir bayramdır. Çünki bilikli və savadlı gənclik, bizim gələcəyimiz, ölkəmizin tərəqqisinin zəmanətidir.
Bu yolda həyatımıza işıqlı yol açan ocaqlardan biri də Bakı Şəhəri Nizami rayonunda yerləşən 227 nömrəli tam orta məktəbdir. Bu məktəbin divarları sadəcə kərpicdən deyil, həm də tarixin və biliyin sədaları ilə yoğrulub. 1937-ci ildə tikilən bu bina, Böyük Vətən Müharibəsi illərində hospital kimi yaralara şəfa paylayıb, daha sonra isə bilik və təhsilin məbədinə çevrilərək gələcək nəsillərə işıq olub. Əsas binaya əlavə olaraq, 2005 və 2007-ci illərdə hər biri 200 yerlik olmaqla, iki əlavə korpus tikilib və istifadəyə verilib. Bu genişlənmə sayəsində, hazırda 1287 şagird bu məktəbin isti qucağında təhsil alır. 2018-ci ildə Azərbaycan Respublikasının Prezidenti cənab İlham Əliyevin sərəncamı ilə məktəb əsaslı təmir olunaraq müasir tələblərə cavab verən bir təhsil mərkəzinə çevrilib. Bu, dövlətimizin təhsilə və gələcəyimiz olan uşaqlara verdiyi böyük dəyərin bariz nümunəsidir.
Bu gün məktəbin hər bir sinif otağı müasir avadanlıqlarla təchiz olunub, kitabxanası bilik xəzinəsi ilə dolub. İnformatika kabineti, laboratoriyalar, idman və akt zalları, hərbi otaq və yeməkxana şagirdlərin hərtərəfli inkişafı üçün hər cür şərait yaradır. Lakin bu divarları canlandıran, bu ocağı isti saxlayan əsas qüvvə, məktəbin fədakar kollektividir. Məktəbin 80 nəfər müəllimi və 27 nəfər texniki işçisi bilik yolunda yorulmadan xidmət edir.
227 saylı orta məktəbin direktoru Sevinc Sadıqova Əlövsət qızı kimi uzaqgörən rəhbər başçılıq edir. Bu fəaliyyət yeni də olsa, bu liderlik sayəsində məktəb bu il daha böyük uğurlara imza atıb. Fənlərin şahı sayılan riyaziyyatı sevdirən, şagirdlərin məntiqini və analitik düşüncəsini formalaşdıran, riyazi anlayışların və terminlərin, rəqəmlərin ilk dəfə nə vaxt və harada işlədilməsi şagirdlərə həmişə böyük maraq yaradır. Ömrünü riyaziyyat elminin sirlərini gənc nəslə öyrətməyə həsr etmiş gözəl insan, işıqlı ziyalılarımızdan biri Cəbr, Həndəsə, İnformatika və Riyaziyyat fənninin müəllimi Alizər Hüseynova Yaqub qızı onlara bilik aləminin qapılarını açır.
Həmçinin, Həmçinin, Həyatımızın ən vacib addımlarından birini atdığımız anlar var. O anlardan biri də məktəbə ilk dəfə getdiyimiz gündür. Bu yeni və böyük dünyada bizi qarşılayan isə ibtidai sinif müəllimləri olur. Onlar sadəcə hərfləri və rəqəmləri öyrətmir, həm də kiçik qəlblərə böyük arzular, güclü xarakter və cəsarət toxumu səpir. Mətanət Rüstəmova da məhz belə bir müəllimlərdəndir. Onun əlləri ilə yoğrulan hər bir şagird, gələcək həyatının təməlini qoyur.İbtidai sinif müəlliməsi olmaq peşədən daha çox bir missiyadır. Mətanət müəllimə bu missiyanın bütün ağırlığını və gözəlliyini çiyinlərində daşıyır. O, hər bir uşağın fərqli bir dünya olduğunu bilir. Bəzisi utancaqdır, bəzisi çox enerjili, bəzisi isə çətinlik çəkir. Mətanət müəllimə hər birinə fərdi yanaşır, onların qorxularını anlayır və onlara inam aşılayır. Onun sinif otağı sadəcə dörd divardan ibarət deyil, orada nağıllar danışılır, rəsmlər çəkilir, mahnılar oxunur və ən əsası, biliklə yanaşı mərhəmət, ədalət və dostluq öyrədilir. Lalə Həsənova Ağabala qızı Azərbaycan dili, Ədəbiyyat, Nitq texnikası, Rus dili müəlliməsi Dil… Bu, sadəcə ünsiyyət vasitəsi deyil. Dil, bir xalqın ruhudur, yaddaşıdır, ürək döyüntüsüdür. Azərbaycan dili də bizim üçün sadəcə danışdığımız bir vasitə deyil, hər bir sözü ilə bizi tarixə, adət-ənənələrə, qədim köklərimizə bağlayan müqəddəs bir bağdır. Azərbaycan dili müəllimi Lalə Həsənova kimi fədakar insanlar sayəsində bu dilin təravəti, zənginliyi və gözəlliyi nəsillərdən-nəsillərə ötürülür.Məktəblərimizdə Azərbaycan dili dərsləri sadəcə qrammatika qaydalarını öyrətmək deyil, həm də milli ruhu aşılamaqdır. Lalə müəllimə kimi müəllimlərin zəhməti sayəsində şagirdlər dilimizin qüdrətini, onun bədii zənginliyini dərk edirlər. Onlar başa düşürlər ki, ana dilini bilmək hər bir Azərbaycan vətəndaşının ən müqəddəs borclarından biridir.
PS:Bizdə AMİDTV.AZ kollektivi adından sizə yeni tədris ilində sonsuz uğurlar, zəngin biliklər və xoşbəxt anlar arzu edirik!
Öyrənən və öyrədən hər kəsə uğurlu əməkdaşlıq, qarşılıqlı hörmət arzulayırıq. Şagirdlərə və tələbələrə əzmkarlıq, əməksevərlik, özünəinam və yeni təhsil zirvələrini fəth etmək, valideynlərə və müəllimlərə müdriklik, səbir, xoşbəxtlik və firavanlıq diləyirik.Qoy məktəbinizin divarları hər zaman bilik və işıqla dolsun, hər bir şagird gələcəyə doğru inamla addımlasın. Bilik yolunuz açıq, qəlbləriniz nurlu olsun!
Bayramınız mübarək! “Bilik günü”nüz mübarək!
YENİNEWSTV24.AZ
Aygün Məmmədova Azərbaycan Jurnalistlər Birliyinin üzvü
