Hər bir millətin gələcəyi onun təhsil sisteminin nə dərəcədə sağlam və müasir təməllər üzərində qurulmasından asılıdır. Təhsil, sadəcə bilik ötürülən bir proses deyil, o, cəmiyyətin ruhunu formalaşdıran, fərdləri yetişdirən və ölkənin sabahını dizayn edən ən əsas sütundur. Bu gün Azərbaycan təhsilinin idarə olunması sahəsində atılan uğurlu addımlar da məhz bu ali məqsədə ,amala xidmət edir. Artıq təhsil sistemi dünənin vərdişləri ilə deyil, sabahın tələbləri ilə idarə olunur.
Bir zamanlar kağız işləri və bürokratik əngəllərlə dolu olan bu sahə, indi rəqəmsal inqilabın bir parçasına çevrilib. “Elektron məktəb” layihələri, müəllim-şagird-valideyn münasibətlərini şəffaf və əlçatan edərək, təhsil prosesinə yeni bir nəfəs gətirib. Valideynlər övladlarının dərs nailiyyətlərini real vaxtda izləyə bilir, müəllimlər isə vaxtlarını sənədləşməyə deyil, birbaşa tədrisə həsr edirlər. Bu, sadəcə texniki bir yenilik deyil, bu, inamın və ədalətin bərpasıdır.
Müəllim kadrlarının seçimi və inkişafı təhsil idarəçiliyinin ən vacib həlqəsidir. Müəllimlərin işə qəbulu imtahanlarının şəffaf və obyektiv aparılması, bu peşəyə layiqli və savadlı gənclərin axınını təmin edib. Bu gün gənc müəllimlər sadəcə maaş arxasınca deyil, həm də cəmiyyətə faydalı olmaq, gələcək nəsilləri yetişdirmək arzusu ilə bu yola qədəm qoyurlar. Onların motivasiyası təkcə bir sinif otağını deyil, bütün bir məktəbi canlandıra bilir.
Hər bir uğurun təməlində innovasiya dayanır. Təhsil sistemində tətbiq edilən yeni tədris metodları və proqramları şagirdlərin sadəcə əzbərçilikdən uzaqlaşaraq, tənqidi düşünmə, problem həll etmə və yaradıcılıq bacarıqlarını inkişaf etdirmələrinə imkan verir. Dərsliklər təkmilləşdirilir, beynəlxalq təcrübələr öyrənilir və milli dəyərlərlə sintez edilir. Artıq təhsilin məqsədi sadəcə bilik yükləmək deyil, həm də şəxsiyyət yetişdirməkdir.
Bu gün ki, idarəetmə sistemində əsas diqqət, təhsildə inklusivliyin təmin edilməsinə yönəlib. Xüsusi qayğıya ehtiyacı olan uşaqların cəmiyyətə inteqrasiyası üçün xüsusi proqramlar həyata keçirilir. Hər bir uşağın, hər bir gəncin potensialını ortaya çıxarmaq üçün fərdi yanaşma prinsipləri əsas götürülür. Çünki bilik okeanında hər bir gəmi öz fərdi yelkəni ilə hərəkət etməlidir.
Təhsil idarəçiliyindəki bu uğurlu addımlar sadəcə statistik rəqəmlərdə deyil, şagirdlərin gözlərindəki parıltıda, müəllimlərin işə olan sevgisində və valideynlərin gələcəyə olan inamında özünü göstərir. Bu inamın sayəsində yeni bir nəsil formalaşır: Vətənini sevən, elmli, savadlı və dünya ilə ayaqlaşa bilən gənclər nəsli. Təhsil idarəçiliyində atılan hər bir addım, gələcəyin işıqlı körpülərini inşa edir və bizi daha parlaq sabahlara aparır.
Ulu öndər Heydər Əliyev Azərbaycanın müstəqilliyini bərpa etdikdən sonra ölkənin gələcəyini məhz təhsilli, savadlı və vətənpərvər gənclərin yetişməsində görürdü. O, təhsilə sadəcə bir sahə kimi deyil, millətin sabahını quracaq bir hərbi-strateji qüvvə kimi yanaşırdı. Təhsil prosesinin idarə olunmasında Heydər Əliyevin töhfələri əvəzsizdir.
Ulu Öndər, təhsil sisteminin ürəyinin müəllim olduğunu bilirdi. Təhsil idarəçiliyindəki ilk və ən böyük töhfələrindən biri müəllimlərin sosial statusunun yüksəldilməsi, onların əməyinin layiqli qiymətləndirilməsi oldu. O, müəllimə olan hörməti bərpa etdi, onların cəmiyyətdəki rolunu ön plana çıxardı. Təhsil işçilərinə verilən fəxri adlar, mükafatlar və qayğı, peşəsinə aşiq olan, vicdanlı müəllim nəslinin formalaşmasına zəmin yaratdı. Bu gün də müəllimlik peşəsinin cəlbedici olması, məhz Heydər Əliyevin o dövrdə qoyduğu təməllərin nəticəsidir.
Dünya ilə inteqrasiya, Azərbaycan təhsilinin inkişafı üçün həlledici idi. Heydər Əliyev təhsil idarəçiliyini beynəlxalq standartlara uyğunlaşdırmaq üçün mühüm addımlar atıldı. Azərbaycanlı gənclərin dünyanın ən nüfuzlu universitetlərində təhsil alması üçün dövlət proqramları təsis edildi. “Xaricdə Təhsil” proqramlarının təməli məhz onun dövründə qoyuldu. Bu, sadəcə diplom qazanmaq üçün deyil, həm də xaricdəki təcrübəni ölkəyə gətirmək, Azərbaycanın intellektual potensialını gücləndirmək üçün atılan uzaqgörən bir addım idi.Müharibənin ağır nəticələri və iqtisadi çətinliklərə baxmayaraq, Heydər Əliyev məktəblərin və təhsil ocaqlarının bərpası və inşasına xüsusi diqqət yetirirdi. O, ölkənin neft gəlirlərinin böyük bir hissəsinin təhsilin inkişafına yönəldilməsi siyasətini aparırdı. Yeni məktəb binaları tikilir, köhnələr təmir edilir, tədris laboratoriyaları və kitabxanalar ən müasir avadanlıqlarla təchiz olunurdu. Bu, gələcəyin memarlarının layiqli şəraitdə yetişməsinə xidmət edən strateji bir addım idi.
Ulu Öndərin təhsilə baxışı, sadəcə bir islahat proqramı deyil, bütöv bir fəlsəfə idi. O, gənclərin təhsilli, savadlı olması ilə yanaşı, həm də milli dəyərlərə bağlı, dövlətçiliyə sadiq bir ruhda yetişməsinə xüsusi önəm verirdi. Onun qoyduğu təməllər üzərində bu gün də Azərbaycan təhsili inkişaf edir və dünyadakı layiqli yerini tutur. Heydər Əliyev təhsil idarəçiliyində uğurlu bir məktəb yaratdı və bu məktəbin yetirmələri bu gün Azərbaycanın gələcəyini qurur.Tarixin sınaqlarından üzü ağ çıxmış bir millət olaraq, biz hər zaman bilmişik ki, ən böyük qüdrət tankda, topda deyil, savadlı nəsillərin beynində, güclü təhsilin təməlindədir.
Ulu Öndər Heydər Əliyevin “Azərbaycan gəncliyi Azərbaycanın gələcəyidir” kəlamı bu gün özünün ən parlaq təsdiqini tapır. Ali Baş Komandan İlham Əliyevin rəhbərliyi ilə həyata keçirilən təhsil siyasəti, gənclərimizin istedadını üzə çıxarmaq, onlara ən yaxşı şəraiti yaratmaq məqsədi daşıyır. Dövlət tərəfindən hər il xaricdə təhsil almaq üçün ayrılan yerlər, gənc mütəxəssislərimizin dünya elmi ilə ayaqlaşmasına imkan verir. Bu, sadəcə təhsilli bir nəsil yetişdirmək deyil, həm də milli inkişafı sürətləndirmək və Azərbaycanın beynəlxalq arenadakı nüfuzunu artırmaq üçün atılan strateji bir addımdır. Qədim dövlətçilik ənənələrindən bəri təhsilə verilən dəyər bu gün də özünün ən yüksək səviyyəsinə çatıb. Ali Baş Komandan İlham Əliyevin rəhbərliyi və Birinci vitse-prezident Mehriban xanım Əliyevanın bilavasitə nəzarəti ilə Azərbaycanın təhsil sistemi yeni bir inkişaf dövrünü yaşayır. Bu qayğı təkcə dövlət siyasəti deyil, gələcəyə, millətin sabahına olan sonsuz inamın təzahürüdür.İlham Əliyevin fəaliyyətində təhsilə olan diqqət hər zaman prioritet olub. Onun “neft kapitalını insan kapitalına çevirək” şüarı məhz bu siyasətin əsasını təşkil edir. Ölkənin hər yerində, ən ucqar kəndlərdə belə, yeni, müasir standartlara cavab verən məktəblərin tikilməsi, mövcud binaların əsaslı təmiri artıq adi bir hal alıb. Bu, sadəcə binaların yenilənməsi deyil, həm də uşaqların təhsilə olan marağının artırılması, onlara təhsildə bərabər imkanlar yaradılması deməkdir.Birinci vitse-prezident Mehriban xanım Əliyevanın təhsilə qayğısı isə daha incə, daha kövrək bir yanaşma ilə müşayiət olunur. Hər zaman uşaqlara, onların gələcəyinə xüsusi həssaslıqla yanaşan Mehriban xanım, Heydər Əliyev Fondu vasitəsilə təhsildəki bir çox boşluqları doldurdu. “Yeniləşən Azərbaycana Yeni Məktəb” layihəsi çərçivəsində onlarla təhsil ocağı inşa edildi. Lakin bu layihələrin ən önəmli tərəfi sadəcə binaların inşası deyil, həm də təhsilin məzmununa, keyfiyyətinə, uşaqların şəxsiyyət kimi formalaşmasına yönələn dərin diqqətdir.
Zəngin tarixi və mədəniyyəti ilə tanınan Qarabağımızın yenidən dirçəlişi, onun qəlbi sayılan təhsilin bərpası ilə başladı.Sevindirici haldır ki , “Yeniləşən Azərbaycana Yeni Məktəb” layihəsi azad olunan torpaqlarımızda da uğurla davam etdirilir. Otuz ilə yaxın bir müddət ərzində düşmən tapdağında qalan torpaqlarımızda hər bir daş, hər bir divar susaraq o qanlı tarixin şahidinə çevrilib.Bu torpaqlara qayıdış sadəcə fiziki bir dönüş deyil, həm də ruhun bərpasıdır. Bu bərpanın ən uca, ən müqəddəs simvollarından biri isə azad olunmuş ərazilərdə ucalan yeni məktəb binalarıdır. Onlar təkcə təhsil ocağı deyil, həm də gələcək nəsillərə ünvanlanan ən böyük mənəvi mesajdır.Hər bir qarışı qanla yoğrulmuş, hər bir daşı şəhidlərin nəfəsi ilə qızınmışdır. 30 illik həsrət sona yetdi, qapısı bağlı məktəblərin paslı qıfılları açıldı, dərsliklər yenidən səhifələrə can gətirdi.
Əvvəllər uşaq səslərinin əks-sədası ilə dolan sinif otaqları indi illərin yorğunluğunu üzərində gəzdirirdi. Dağılmış divarlar, sökülmüş damlar, soyuq dəhlizlər… Lakin bu dağıntıların içində yeni bir həyatın başlanğıcı gizlənmişdi. Azərbaycanın üçrəngli bayrağı altında yeni bir fəsil yazılırdı. Təhsil işçiləri, müəllimlər və ziyalılar bu müqəddəs vəzifəyə böyük bir sevgi və inamla yanaşırdılar. Onlar təkcə bilik vermək üçün deyil, həm də bu torpaqlarda yaşayan gələcək nəsillərə Vətən sevgisini aşılamaq üçün qayıdıblar.
Bu ərazilərdə təhsilin təşkili sadəcə məktəb binası tikməkdən ibarət deyil. Bu, həm də kövrək uşaq qəlblərinin zənginləşdirilməsi, onlara müasir biliklərlə yanaşı, doğma torpaqlarının tarixi, mədəniyyəti və qəhrəmanlıq salnaməsi haqqında dəyərlərin çatdırılmasıdır. Füzulidə, Cəbrayılda, Ağdamda, Xocavənddə Zəngilanda,Şuşada və Xankəndidə digər azad olunmuş rayonlarda qurulan inşa olunan məktəblərin içəriləri gələcəyə böyük ümidlərlə doludur .Uşaqlar illər sonra öz dədə-baba yurdlarında ana dilində oxumağın sevincini yaşayır, hərfləri təkcə kitablarda deyil, həm də Vətənin daşında-torpağında öyrənirlər.
Dövlət tərəfindən həyata keçirilən layihələr təkcə maddi-texniki bazanın gücləndirilməsini deyil, həm də müəllim kadrlarının ixtisaslaşmasını əhatə edir. Peşəkar müəllimlər üçün xüsusi proqramlar hazırlanır, onlara ən müasir tədris metodları öyrədilir. Məqsəd, Qarabağın uşaqlarının dünyadakı həmyaşıdlarından heç bir cəhətdən geri qalmamasıdır. Onlar Vətənə bağlı, millətə sevgi bəsləyən, eyni zamanda müasir dünyanın çağırışlarına cavab verən intellektual gənclər kimi yetişməlidirlər.
İşğal altında yerləşən yaşayış evləri, təhsil, sənaye və kənd təsərrüfatı obyektləri ilə yanaşı, yüzlərlə mədəniyyət müəssisəsi, o cümlədən 4,6 milyon kitab fondu olan 927 kitabxana, 808 mədəniyyət sarayı, klub və mədəniyyət evi, 85 musiqi və rəssamlıq məktəbi, 100 mindən artıq eksponatın toplandığı 22 muzey və muzey filialı, 4 rəsm qalareyası, 4 teatr müəssisəsi, 2 konsert müəssisəsi, 8 mədəniyyət və istirahət parkı, Qarabağ münaqişəsinə qədər dövlət qeydiyyatına alınan 700-dən artıq tarix və mədəniyyət abidəsi erməni vandalizminin qurbanına çevrilib. Bu gün 30 ilə yaxın işğal altında olan torpaqlarımızda abadlıq-quruculuq işləri vüsət alıb. Hazırda qarşıda dayanan ən mühüm vəzifələrdən biri də işğaldan azad olunan ərazilərdə təhsil ocaqlarının tikintisidir. İşğaldan azad edilmiş ərazilərdə təhsilin inkişafı ilə bağlı tədbirlər xüsusi əhəmiyyət kəsb edir.
Bu günlərdə Azərbaycan Respublikasının Prezidenti İlham Əliyev Kəlbəcər şəhərində 960 şagird yerlik məktəb binasının təməlin qoyub. Əlbəttə ki, bu, işğaldan azad olunmuş ərazilərin bərpası prosesində müasir təhsil infrastrukturunun qurulmasına xüsusi diqqət yetirildiyinin əyani təzahürüdür. Kəlbəcərdə təməli qoyulan məktəb binası ən müasir standartlara uyğun inşa olunacaq. 41 sinifdən ibarət olacaq məktəb binasında fizika, kimya, biologiya, informatika kabinetləri, müxtəlif təyinatlı səkkiz laboratoriya, akt və idman zalları, yeməkxana və digər zəruri otaqlar yaradılacaq. Qeyd edək ki, Kəlbəcər rayonunda ilk məktəb 1924-cu ildə fəaliyyətə başlamışdır.
Kəlbəcər rayonu işğal edilməzdən əvvəl rayonda 96 ümum təhsil məktəbi, o cümlədən 46 tam orta, 42 ümumi orta, 8 ibtidai məktəb vardı. Bunlardan əlavə 1 texniki peşə məktəbi, 2 əyani-qiyabi məktəb, 8 məktəbdən kənar və 4 məktəbə qədər təhsil müəssisə də fəaliyyət göstərirdi. Kəlbəcər rayonunda Başlıbel kənd 600 yerlik, Zülfüqarlı kənd 820 yerlik, Yanşaq kəndində 850 yerlik ,Qılınçlı 420 yerlik, Kəlbəcər şəhər 1,2,3 nömrəli məktəblərdə hər biri 650 yerlik, İstisu qəsəbə 800 yerlik məktəb binaları da işğaldan əvvəl istifadəyə verilmişdir.
Kəlbəcər 189 nömrəli peşə məktəbi Goranboy rayonunda Qaraqoyunlu kəndində fəaliyyətini davam etdirir. Məzunların bir çoxu ayrı-ayrı şirkətlərdə, özəl və dövlət müəssisələrində peşələrinə uyğun iş tapıb işləyirlər. Əlbəttə ki, bu gün ümumtəhsil orta məktəblərlə yanaşı, müasir çağırışlara cavab olaraq peşə təhsili sisteminin müasirləşdirilməsi istiqamətində məqsədyönlü tədbirlər həyata keçirilir. Azərbaycanda peşə təhsilinin inkişaf etdirilməsi prioritet istiqamət kimi müəyyən olunub. Bu sahədə peşəkar tədris prosesinin qurulması, əmək bazarının, o cümlədən işəgötürənlərin tələbatlarına uyğun ixtisaslar üzrə kadr hazırlığının təmin olunması qarşıda duran əsas vəzifələrdən biridir. Son dövrlər paytaxt Bakı ilə yanaşı, bölgələrdə də yeni peşə təhsili müəssisələri qurulur. Prezident İlham Əliyevin 2016-cı il aprelin 20-də imzaladığı Fərmanla Təhsil Nazirliyi yanında Peşə Təhsili üzrə Dövlət Agentliyinin yaradılması ölkəmizdə peşə təhsilinin səmərəliliyinin artırılması və rəqabətqabiliyyətli ixtisaslı kadrların hazırlanması baxımından mühüm addım oldu. Daha sonra Təhsil Nazirliyinin tabeliyində Peşə Təhsilinin İnkişafı Fondunun yaradılması, peşə təhsili sahəsində bir sıra normativ hüquqi aktların qəbul olunması, peşə təhsili müəssisələrinin birləşdirilməsi və müəyyən ixtisaslaşmış peşə təhsili mərkəzlərinin yaradılması yolu ilə müasir standartlara cavab verən pilot peşə təhsili müəssisələrinin qurulması da Yol Xəritəsində qarşıya qoyulan mühüm vəzifələrdəndir.
Füzuli şəhərində Peşə Liseyinin təməlinin qoyulması da bu istiqamətdə həyata keçirilən layihələrdən biridir. Füzuli şəhərində inşa olunacaq Peşə Liseyinin ərazisi 3,2 hektar sahəni əhatə edəcək. Kompleksdə tədris, laboratoriya təcrübələri, idman binaları və meydançası yaradılacaq. Burada, həmçinin avtomobil təmiri emalatxanası, avadanlıq və texnika, təsərrüfat anbarları, təsərrüfat qurğusu, praktik təlimlər qurğusu da inşa ediləcək. Kompleksin elektrik enerjisi ilə fasiləsiz təminatı üçün transformator yarımstansiyası da quraşdırılacaq. Füzuli şəhər Peşə Liseyinin inşası zamanı yaşıllıq zolaqlarının yaradılması xüsusilə diqqətdə saxlanılıb. Belə ki, yaşıllıq sahəsi bu kompleksin ərazisinin 43,7 faizini təşkil edəcək. Burada yaradılacaq idman meydançasının sahəsi 540 kvadratmetr olacaq.
Lisey ildə 800-yə yaxın tələbə qəbul etməklə yanaşı, 1000-dək tələbə üçün qısamüddətli kurslar və ömürboyu təhsil proqramları təmin etmək imkanında olacaq. Bu sahədə həyata keçirilən tədbirlər gənclərin müvafiq peşələrə yiyələnərək məşğulluğunun təmin olunmasına, eləcə də müəssisə və təşkilatların ixtisaslı kadrlarla təminatına əhəmiyyətli təsir göstərir.
Azərbaycanın müxtəlif bölgələrindən, eləcə də Ağalı sakini olan 14 müəllim məktəbdə dərs deyəcək: “Sevindirici hal idi ki, burada işləmək üçün təxminən 800-ə yaxın müəllim müraciət etmişdi. Sakinlərin köçü davam etdiyindən yaxın həftələrdə şagird sayının artması gözlənilir.Hər gün uşaqların çantasında gəzdirdiyi dərs kitabları, məktəbin həyətində səslənən gülüşlər, lövhəyə yazılan hər bir cümlə Qarabağda yeni bir dirçəlişin carçısı olacaq. Bu torpaqlarda yenidən fidanlar boy atıb, gələcəyin memarları yetişəcək. Təhsil, bu dirçəlişin ən əsas sütunlarından biri olacaq.Təhsil fədailəri təkcə bir fənni öyrətmir, həm də uşaqları cəsarətli, vətənpərvər və savadlı bir vətəndaş kimi yetişdirir.
Bu günlər, bu torpaqlarda Bilik Gününü qeyd edən hər bir şagirdin gözlərində həm bir qürur, həm də bir məsuliyyət parıltısı var idi. Onlar, Vətən torpaqları uğrunda canından keçən şəhidlərimizin xatirəsinə ucalan məktəblərdə, azadlığın qiymətini daha dərindən hiss edərək təhsilə qədəm qoyurlar. Bu uşaqlar təkcə bilik almırlar, onlar həm də şəhid ruhuna layiq olmağın, cəsur, savadlı və Vətənə sadiq bir vətəndaş kimi yetişməyin ilk dərsini keçirlər.
Bu yol hələ uzun və çətin olsa da, Qalib Azərbaycanın uşaqlarının gözlərindəki işıq, müəllimlərin bu müqəddəs işə olan sevgisi və dövlətin güclü dəstəyi ilə hər bir çətinlik aşılacaq. Çünki bu torpaqlarda təhsil sadəcə bir proses deyil, bu, Zəfərin bərpası, gələcəyin qurulması və illərlə unudulmuş bir nəslin yaddaşının yenidən canlandırılmasıdır.
Qarabağda, Xankəndidə yenidən ucalan Qarabağ Universitetinin bərpa olunaraq istifadəyə verilməsi, dörddəbir əsrdən çox sürən qaranlığın ardından doğan bir Günəş kimidir.Universitetin foyesi, auditoriyaları bir vaxtlar mərmilərin, dağıntıların izlərini daşıyırdı. İndi isə o izlərin yerini müasir texnologiyalar, parıldayan işıqlar, yeni dərsliklər, kompüterlər tutub. Hər bir tələbə özünə burada yeni bir dünya kəşf edir. Onlar sadəcə mühazirələrə qulaq asmırlar, onlar həm də Qarabağın bərpasının iştirakçılarına çevrilirlər. Bu torpağın hər bir daşında, hər bir ağacında, hər bir axar suyunda özlərinin elmi kəşflərinin, layihələrinin izlərini axtarırlar.Qarabağ Universiteti təkcə bir təhsil ocağı deyil, həm də bir mədəniyyət, sənət, inkişaf mərkəzidir. Burada gənclər sadəcə peşəkar kimi yetişmir, onlar həm də milli dəyərlərin, zəngin mədəni irsin daşıyıcıları olurlar. Bu, Qarabağın musiqisinin, şeirinin, sənətinin tədqiq edildiyi, yaşandığı, gələcək nəsillərə ötürüldüyü bir məkandır. Bu, bir vaxtlar Qafqazın konservatoriyası adlandırılan bu diyarın öz köklərinə qayıdışıdır.Bilik və elmin işığı ilə aydınlanan bu gənclər yaxın gələcəkdə Qarabağın, eləcə də bütün Azərbaycanın inkişafına yeni nəfəs gətirəcəklər. Onlar yeni iqtisadi layihələrə imza atacaq, texnoloji inkişafı sürətləndirəcək, elm dünyasına yeni töhfələr verəcəklər. Onlar, əlbəttə, Vətən müharibəsində zəfər qazanan nəsildir və bu zəfəri elmlə, biliklə möhkəmləndirməyə hazırdırlar.
14 Sentyabr 2025 ildə istifadəyə verilən Qarabağ Universiteti Klinikası Tibb və Sağlamlıq Elmləri fakültəsi, bir təhsil ocağından daha çox, bir simvoldur. Bu, 30 illik bir yaranın üzərinə sərpilən müalicəvi bir toz, gələcəyə doğru atılan bir addımdır çünki,bu fakültə sadəcə tələbələrə bilik verməyəcək, həm də bölgənin inkişafı üçün yeni bir qan dövranı yaradacaq. Universitet, bölgəyə təkcə gəncləri deyil, həm də müəllimləri, alimləri və mütəxəssisləri cəlb edərək, buranı intellektual bir mərkəzə çevirəcək. Bu fakültə, müasir avadanlıqlar, laboratoriyalar və beynəlxalq standartlara uyğun təhsil proqramları ilə təchiz olunub. Tələbələr nəzəri bilikləri birbaşa Qarabağ Universiteti Klinikasında praktikaya çevirmək imkanı qazanacaqlar. Bu Klinika bütöv Azərbaycanın səhiyyə sisteminin inkişafına da öz töhfəsini verəcək.
Biz əminik ki,Ali Baş Komandan İlham Əliyevin vurğuladığı kimi Xankəndi tezliklə Tələbə şəhərciyinə çevriləcək . Xankəndi tələbə şəhərciyinə çevrilməklə, Azərbaycanın təhsil xəritəsində yeni bir parlayan ulduz olacaq. Burada təkcə Azərbaycanlı tələbələr yox, həmçinin xarici tələbələr də təhsil alacaqlar. Bu, Azərbaycanın təhsil sahəsindəki nüfuzunu daha da artıracaq, həmçinin müxtəlif mədəniyyətlərin bir araya gəldiyi bir məkana çevriləcək.
Hər bir millətin gələcəyi, qədim xəritələrdə, yeraltı sərvətlərdə, yaxud da hərbi gücdə deyil, onun övladlarının gözlərindəki işıqda, zəkasında və dünyagörüşündə gizlənib. Azərbaycan Respublikasının parlaq gələcəyi, işıqlı sabahı və dünyada artan nüfuzu da məhz savadlı, dünyagörüşlü, nümunəvi şəxsiyyətlərimizin yetişməsindən asılıdır.
Uğur, təkcə iqtisadi göstəricilərdən, yaxud da texnoloji tərəqqidən ibarət deyil. Əsl uğur, bir xalqın öz dəyərlərinə, öz torpağına olan sevgisinin və bu yolda nələrə qadir olduğunu göstərməsidir. 44 günlük Vətən müharibəsi, Azərbaycan xalqının bu böyük ruhunu, sarsılmaz iradəsini bütün dünyaya nümayiş etdirdi. Hər bir əsgərimiz, hər bir zabitimiz, hər bir döyüşçümüz, əllərində silah, qəlblərində Vətən sevgisi ilə irəlilədi. Onlar düşməni məğlub etmək üçün deyil, yurdumuza, tariximizə və azadlığımıza sahib çıxmaq üçün döyüşürdülər.
Şəhidlərimizin qanı ilə suvarılan torpaqlarımızda bu gün körpülər, yollar, məktəblər və şəhərlər salınır. Bu bərpa işləri sadəcə maddi dəyərlər deyil, həm də qəhrəmanlığın mirasıdır. Hər bir yeni ev, hər bir yeni məktəb binası, açılan mədəniyyət ocaqları,yeni təhsil kompleksi,o qəhrəmanların bizə verdiyi əmanətdir. Biz bu əmanətə layiq olmalı, onu göz bəbəyimiz kimi qorumalı və gələcək nəsillərə çatdırmalıyıq. Onlar bizə yalnız azad torpaqlar deyil, həm də bir xalqın ruhunu necə dirçəldə biləcəyinin ən parlaq örnəyini bəxş etdilər.
Tarix yazan qəhrəmanlar unudulmur,öz adlarını qızıl hərflərlə hər qarış Vətən torpağına, şanlı tarixin səhifələrinə ,hər vətəndaşın ürəyinə qələbə və igidlik dastanları ilə yaddaşlara həkk etdilər!
YENİNEWSTV24.AZ
İlahə Əliyeva Azərbaycan Turizm və Menecment Universiteti Menecment kafedrasının baş müəllimi iqtisad elmləri üzrə fəlsəfə doktoru