Azərbaycan musiqi mədəniyyətinin çağdaş tarixində elə sənətkarlar vardır ki, onların adı təkcə ifaçı kimi deyil, bir dövrün ruhunu ifadə edən estetik zövq kimi yadda qalır. Xalqın yaddaşına dərin qatlarına nüfuz edən bu səslərdən biri də dekabrın 23-də doğum gününü qeyd edən, özünəməxsus vokal koloriti və bədii duyumu ilə seçilən əməkdar sənətkar Nəzpəri Dostəliyevadır. 1959-cu ildə Bakıda dünyaya göz açan Nəzpəri Dostəliyevanın sənət yolu tale ilə səhnənin qovuşduğu məqamdan başlayır. O, peşəkar musiqi təhsilini 2002-ci ildə Azərbaycan Dövlət İncəsənət Universitetində tamamlayaraq, öz sənət yolunu akademik əsaslar üzərində möhkəmləndirmiş- dir. Lakin onun səsinin cazibəsi və emosional gücü rəsmi diplomdan çox-çox əvvəl dinləyicilərin qəlbinə yol tapmışdı.1996-cı ildə böyük səhnəyə atılan ilk addımlar qısa zamanda möhkəm sənət yürüşünə çevrildi. “Nə olar, Allahım, ayırma bizi” mahnısı yalnız bir hit deyil, bütöv bir dövrün sevgi, ayrılıq və dua fəlsəfəsini əks etdirən musiqi manifesti oldu. Bu ifa Nəzpəri Dostəliyevanın səsindəki daxili dramatizmi, qadın duyğusunun incəliklərini və milli musiqi təfəkkürünün dərinliyini açıq şəkildə ortaya qoydu.1998-ci ildən Azərbaycan Dövlət Teleradio Şirkətinin solisti kimi fəaliyyət göstərən sənətkar, 25 disk və 3 albomla zəngin yaradıcılıq irsi formalaşdırmışdır. Bu irs təkcə kəmiyyət göstəricisi deyil, mövzu müxtəlifliyi, poetik mətnlərə həssas münasibət və musiqi-estetik bütövlük baxımından elmi-tədqiqat marağı doğuran sənət hadisəsidir.Nəzpəri Dostəliyevanın yaradıcılığında beynəlxalq mədəni dialoq xüsusi yer tutur. Parisdən Osloya, Amsterdamdan, Bonn və Frankfurta, Norveçdən Türkiyənin Lütfü Kırdar adına möhtəşəm konsert salonuna qədər uzanan səhnə yolu Azərbaycan musiqisinin dünya auditoriyasına təqdimatında mühüm rol oynamışdır. Xüsusilə Norveçdə Skruk xoru ilə birgə çıxışları və Nordkap festivalında birinci yerə layiq görülməsi onun ifa mədəniyyətinin universallığını sübut edir.1999-cu ildən etibarən bəstəkar və aranjımançı Səyavuş Kərimi ilə qurulan yaradıcılıq tandemi müasir Azərbaycan estrada musiqisində peşəkar sintez nümunəsi kimi dəyərləndirilə bilər. Bu əməkdaşlıq musiqidə emosional dərinliklə intellektual yanaşmanın harmoniyasını yaratmışdır. Sənətkarın videoqrafiyası və filmoqrafiyası da onun çoxşaxəli yaradıcılığını təsdiqləyir. “Qağayı” filmindəki iştirakı Nəzpəri Dostəliyevanın bədii obraz yaratmaq potensialının yalnız musiqi ilə məhdudlaşmadığını göstərir.Bu gün Nəzpəri Dostəliyeva təkcə məşhur müğənni deyil, Azərbaycan qadınının sənətdəki ləyaqətini, dözümünü və ruh zənginliyini təmsil edən mədəni simadır. Onun səsi illərin sınağından keçmiş, zamanla bərkiyən bir yaddaşdır – sevincdə də, kədərdə də insanı özünə qaytaran bir səsdir. Hər dinlədikdə xəyallara aparan, hər misrada özünü tapan ,yüksək zövqlə seçilmiş əsərlərdə böyük iz qoyan nadir sənətkardır.
Qoy səsiniz daim ucalardan gəlsin, sənət yolunuz ilhamla, ömür yolunuz sağlamlıq və sevgi ilə müşayiət olunsun. Azərbaycan mədəniyyəti sizin kimi sənətkarlarla daha da zəngindir.
PS:Sənət fədaisi, milyonların sevimlisi olan Nəzpəri xanımı doğum günü münasibətilə kollektivimiz adından ürəkdən təbrik edirik!”Sənət əbədidir, səs isə ruhun aynasıdır. Sizin aynanızda hər zaman sevgi, səmimiyyət və vətən eşqi əks olunub.” Sizə yeni yaradıcılıq uğurları, cansağlığı və musiqimizin zirvələrində daim parlamağı arzulayırıq. Doğum gününüz mübarək, sənət dünyamızın öz ahəngi ilə seçilən, ekranları öz güvəni və gözəlliyi ilə bəzəyən nəfis səsli xanımı Nazpəri Dostəliyeva!
YENİNEWSTV24.AZ
Aygün Məmmədova Azərbaycan Jurnalistlər Birliyinin üzvü