Lənkəranda mərhum şair Vaqif Hüseynovun 90 illik yubileyi qeyd olunub.
26 may 2026-cı il tarixdə Lənkəran Mərkəzləşdirilmiş Kitabxana Sisteminin və AYB Lənkəran Bölməsinin birgə təşkilatçılığı ilə “Unudulmayanlar” layihəsi çərçivəsində mərhum şair Vaqif Hüseynovun anadan olmasının 90 illiyinə həsr olunmuş yubiley tədbiri keçirilib.
Tədbirdə bölgə yazarları, kitabxana əməkdaşları, yubilyarın ailə üzvləri, ziyalılar və mədəniyyət işçiləri iştirak ediblər.
Tədbiri giriş sözü ilə açan AYB Lənkəran Bölməsinin sədri, yazıçı-dramaturq Qafar Cəfərli iştirakçıları salamlayıb. Daha sonra şəhidlərin əziz xatirəsi bir dəqiqəlik sükutla yad edilib. Qafar Cəfərli çıxışında ötən əsrin 60-cı illər ədəbi nəslinin nümayəndəsi olan Vaqif Hüseynovun cəmi 49 illik ömründə istedadlı jurnalist, şair və publisist kimi zəngin ədəbi irs qoyub getdiyini vurğulayıb.
Lənkəran MKS-nin direktor vəzifəsini icra edən Arzu Rufullayeva çıxışında bildirib ki, Vaqif Hüseynovun 90 illik yubiley tədbiri AYB Lənkəran Bölməsi ilə birgə “Unudulmayanlar” layihəsi çərçivəsində keçirilən növbəti tədbirdir və tədbirin əhəmiyyətindən danışaraq iştirakçılara uğurlar arzulayıb.
AYB Lənkəran Bölməsinin ədəbi məsləhətçisi, şair Ağamir Cavad isə məruzəsində Vaqif Hüseynovun həyat və yaradıcılığından bəhs edib. O, böyük söz ustadının bu gün də sevildiyini və gələcəkdə də sevgi ilə yad olunacağına əminliyini ifadə edib.
Tədbirdə çıxış edən Lənkəran MKS-nin Kitabişləmə şöbəsinin müdiri Aytən Hüseynova, tanınmış alim və şair Tükəzban Cahangirova, şairlər Xatirə Xatun və Əhməd Haqsevər, yubilyarın qohumu Cavanşir Qasımov, LDU-nun dosenti, Lənkəran Tarix və Diyarşünaslıq Muzeyinin direktoru Leyla Məcidova, həkim Ənvər Rüstəmov, əməkdar məşqçi İdrak Dadaşov, şair İltifat Salehin qızı Afaq Eyvazova, mərhum bəstəkar və qarmon ifaçısı Ağadadaş Abdullayevin qardaşı qızı Samirə Hüseynzadə yubilyarla bağlı xatirələrini və düşüncələrini bölüşüblər.
Gənc şair Aqşin Mahir yubilyara həsr etdiyi şeirini səsləndirib. Aynur İsmayıl, Gülmirə Səmidova və Zemfira Təhməzli tərəfindən Vaqif Hüseynovun şeirlərinin bədii qiraəti iştirakçılar tərəfindən maraqla qarşılanıb.
Tədbirdə Respublikanın tanınmış müğənnisi Cavad Rəcəbovun, peşəkar muğam ustadı İmamverdi Ağayevin, gənc müğənnilər Əsəd Məmmədov və Allahverən Pərvizoğlunun ifasında Vaqif Hüseynovun sözlərinə bəstələnmiş və ona həsr olunmuş mahnılar səsləndirilib və tədbirə xüsusi rəng qatıb.
Sonda yubilyarın qızı Xalidə Vaqifqızı çıxış edərək təşkilatçılara və iştirakçılara minnətdarlığını bildirib.
Tədbir Yazıçı-dramaturq Qafar Cəfərlinin yekun nitqi ilə başa çatıb, xatirə şəkilləri çəkdirilib.
YENİNEWSTV24.AZ
Allahverən Pərvizoğlu
