Xudaverdi Şirvan oğlu Əliyev 27 mart 1925-ci ildə Lənkəran şəhərində anadan olmuşdur. O, ömrünün böyük hissəsini Vətənə, dövlətə və xalqa xidmətə həsr etmiş, həm hərbi, həm də mülki fəaliyyətində öz məsuliyyəti, prinsipiallığı və dürüstlüyü ilə seçilmişdir.
1943-cü ildə, 18 yaşında olarkən öz arzusu və müraciəti ilə Böyük Vətən müharibəsinə yollanmışdır. Həmin dövrdə alman faşist qoşunlarının Stalinqrad ətrafında apardığı döyüşlər və Qafqaza doğru irəliləmək cəhdləri ilə əlaqədar cəbhəyə göndərilmişdir. Bir müddət döyüşlərdə iştirak etdikdən sonra düşmən qüvvələrinin geri çəkilməsi ilə əlaqədar göstərdiyi xidmətlərə görə “Qafqazın müdafiəsinə görə” medalı ilə təltif olunmuşdur.
Daha sonra Sovet-İran sərhədində hərbi qulluqçu çatışmazlığı yarandığından İran-Astara sərhəd qoşunlarına göndərilmişdir. 1945-ci ildə müharibə başa çatsa da, sərhəd bölgələrindəki hərbi xidmətini davam etdirmiş, 1950-ci ilədək Astara-Naxçıvan istiqamətində Sovet-İran sərhədinin müxtəlif sahələrinin mühafizəsində iştirak etmişdir.
Nümunəvi xidmətinə görə 1950-ci ildə birbaşa Mərdəkan qəsəbəsində yerləşən Bakı Milis Məktəbinə göndərilmişdir. 1952-ci ildə zabit rütbəsi alaraq Lənkəran rayonunun Avrora qəsəbəsinə sahə rəisi təyin edilmişdir. Bununla da onun hüquq-mühafizə orqanlarında uzunmüddətli xidmət yolu başlamışdır.
1959-cu ildə Azərbaycan Dövlət Universitetinin Hüquq fakültəsinə qəbul olunsa da, bir il sonra ailə vəziyyəti ilə əlaqədar təhsilini yarımçıq dayandırmağa məcbur olmuşdur. Buna baxmayaraq, Lənkəran Rayon Milis Şöbəsində fəaliyyətini davam etdirərək müxtəlif ərazilərdə sahə rəisi vəzifəsində çalışmışdır.
Tələbkarlığı, intizamı, yüksək məsuliyyəti və prinsipiallığı ilə seçilən Xudaverdi Əliyev Partiya Komitəsinin qərarı ilə Lənkəran Rayon Milis Şöbəsinin Partiya Təşkilatının katibi seçilmişdir. Ona həvalə olunan vəzifələri uzun illər ərzində vicdanla və şərəflə yerinə yetirmiş, xalqa xidmət etməyi həyatının əsas amalı hesab etmişdir.
İllərlə davam edən gərgin və məsuliyyətli xidmət, keçdiyi müharibə yolu və yaşadığı çətinliklər onun səhhətinə və əsəb sisteminə təsir göstərmişdir. Bu səbəbdən 1971-ci ildə, 48 yaşında olarkən təqaüdə çıxmaq məqsədilə öz ərizəsi ilə Daxili İşlər Nazirliyinə müraciət etmişdir. Dəfələrlə etdiyi müraciətlərdən sonra çətinliklə də olsa, təqaüdə buraxılmışdır.
1974-cü ildə Lənkəran aeroportu fəaliyyətə başladıqdan sonra onun ilk rəisi kimi əmək fəaliyyətini davam etdirmişdir. Bir müddət sonra ictimai iaşə müəssisələrində müxtəlif vəzifələrdə çalışmış, əmək fəaliyyətinin sonrakı mərhələsində isə “Beşəru” restoranının müdiri vəzifəsini icra etmişdir.
Xudaverdi Əliyev həm müharibə veteranı, həm də əmək veteranı kimi xidmətlərinə görə ümumilikdə 9 orden və medalla təltif olunmuşdur. Bu təltiflər onun Vətən qarşısında xidmətlərinin, uzun illər ərzində göstərdiyi fədakarlığın və zəhmətinin bariz ifadəsidir. Xudaverdi Şirvan oğlu Əliyev ömrünün böyük hissəsini Vətənə, dövlətə və xalqa xidmətə həsr etmişdir. Hərbi və mülki həyatında zəhməti, iradəsi, məsuliyyəti və dürüstlüyü ilə seçilmişdir. O, ailəsi və yaxınları üçün əziz, unudulmaz insan, onu tanıyanların yaddaşında isə mərd döyüşçü, intizamlı zabit, hörmətli və vicdanlı şəxsiyyət kimi qalmışdır. Onun 65 illik həyat yoldaşı Gülbacı Əliyeva ziyalı, mədəni, imanlı, ailəsinə bağlı, ömür-gün yoldaşına daim qayğı göstərən bir xanım olmuşdur. Bu ailədə böyüyüb boya-başa çatan övladları da valideynlərinin verdiyi tərbiyəyə layiq insanlar kimi yetişmişlər. Övladlarından Həqiqət Axundova və Mahirə Yaqubova həkim, Sadiq Əliyev mühəndis, Namiq Əliyev və Nailə Əliyeva isə ziyalı insanlardır.
Xudaverdi Şirvan oğlu Əliyev 23 iyun 1996-cı ildə dünyasını dəyişmişdir. Onun keçdiyi şərəfli həyat yolu, Vətənə və xalqa xidmətləri, ailəsinə bəxş etdiyi sevgi və qayğı heç vaxt unudulmayacaqdır.
Belə insanların ömür yolu yalnız bir ailənin deyil, bütöv bir nəslin və cəmiyyətin yaddaşında yaşamalıdır. Çünki Vətənə xidmətlə keçən ömürlər tarixə çevrilir, bu tarix isə gələcək nəsillər üçün örnək olur.
Seadət Abdullayeva
Lənkəran Tarix-Diyarşünaslıq Muzeyinin elmi işçisi


